கனக நெடுங்கடை திறமினோ.

கனக நெடுங்கடை திறமினோ.


செயங்கொண் டானெனும் சீரிய புலவன்
நயங்கொண் டுரைத்த கலிங்கத்துப் பரணியில்
வயங்கொள் வஞ்சியர் கொழுநரை மறுத்து
தயங்கின ரேகடை திறந்திடல் வெறுத்து


கனக நெடுங்கடை திறந்திடு வீரென
மனம் நெகிழ்ந்தனர் மாண்புடை வீரர்கள்
இனிதாம் அந்த ஊடலின் அழகினை
இன்புறும் வண்ணம் உரைத்திடு வோமே.


“வாரணம் ஆயிரம் கண்டு: வெற்றித்
தோரணம் தன்னைப் பூண்டு: நின்
பேரினில் காதல் கொண்ட: அன்புப்
பித்தனுக் காய்நெடுங் கடை திறமினோ.


நாடு காக்கும் பணிக்காய்ச் சென்று
ஆடும் களத்தே பகைவரைக் கொன்று
தேடும் உன்றன் அன்பன் வந்தேன்
தேவி கனகநெடுங் கடை திறமினோ.


போரில் ஆயிரம் இடர்களை வென்று
புறமுது கில்லா ஆற்றல் கொண்டு
வீரம் செறிந்த சாதனை புரிந்த
வெற்றி மகற்காய்க் கடை திறமினோ.


கனக நெடுங்கடை அடைத்து வைத்து
மனதி னிலேபொய்க் கோபங் கொண்டு
தினமும் ஏங்கிய தேன்மலர் உறவைத்
தள்ளுதல் முறையோ தாழ் திறமினோ.


வேலின் ஒலிக்கு அஞ்சா நெஞ்சம்
நூலிடை யாள்விழிக் கஞ்சுதல் முறையோ
பாலில் வடித்த பாவாய் உன்றன்
பாசத் துணைக்காய்த் தாழ் திறமினோ.


சோழன் புலிக்கொடி கலிங்க மண்ணில்
கோல மிட்டுப் பறந்திடல் பாராய்
வேழம் அனைய வேந்தன் படைதரு
வீரன் வந்தனன் நெடுங்கடை திறமினோ.


காலம் மாளினும் கடமை பெரிதென
ஞாலம் வியக்கும் பரணி எழுந்திட
ஆல மரம்போல் அரசு தழைத்திட
வாழ்வோ னுக்காய்க் கடை திறமினோ.


உன்றன் விழியின் ஓரம் வியர்த்தது
என்றன் வேல்முனை வேழம் பெயர்த்தது
சிந்தை முழுதும் நிறைந்த பெண்ணே
செந்தமிழ்ப் பாவாய் நெடுங்கடை திறமினோ.


வாசலில் பார்த்தனை வரவின்றிச் சோர்ந்தனை
நேசத்திற் துடித்தனை நினைந்துயிர் வருந்தினை
பாசத்தில் விளைந்த பசுங்கொடியே யென்
ஆசைக் கிளியே நெடுங்கடை திறமினோ.


இன்னொரு யுத்தம் இப்போதைக் கில்லை
என்னருந் துணையே இனிப்பிரி வில்லை
பொன்னுடல் தழுவிப் புதுக்கதை பேசி
இன்னுயி ராவோம் கடைதிற வாயோ?.



கந்தவனம் கோணேஸ்வரன்
27.04.2020

கருத்துகள்

கருத்துரையிடுக

இந்த வலைப்பதிவில் உள்ள பிரபலமான இடுகைகள்

தமிழ் இலக்கணம் அறிவோம் - இயல் 02 - பகுதி 4

பதவியல் 4 இடைச் சொற்கள்.  இடைநிலை. ஒரு பகுபதத்தில் பகுதி, விகுதி என்பவற்றுக்கு அடுத்தபடியாக முக்கிய இடம் வகிப்பவை இடைநிலைகளாகும். விகுதியானது திணை, பால் எண், இடம் என்பவற்றைக் காட்டுவதுபோல் வினைச் சொற்களுடன் இணைந்துவருகின்ற இடைநிலைகள் காலத்தைக் காட்டுகின்றன. பெயர்ச்சொற்களிடையே வருகின்ற இடைநிலைகள் காலங்காட்டுவதில்லை. இவற்றின் தன்மையைக் கொண்டு அறிஞர்கள் மூவகைப் படுத்தியுள்ளனர். அவை பெயர் இடைநிலை, வினை இடைநிலை, எதிர்மறை இடைநிலை என்பவையாம்.  பெயர் இடைநிலை: இவை பெயர்ச்சொற்களின் பகுதி, விகுதிகளுக்கு இடையே வருகின்றதெனினும் காலங்காட்டுவதில்லை. உதாரணமாக, அறிஞன், வலைஞன், சுவைஞன் என்பவற்றில் வருகின்ற ‘ஞ’கர மெய் இடைநிலை எனப்படுகிறது. அதேபோல் வலைச்சி என்ற பகுபதத்தில் வருகின்ற ‘ச்’, குறத்தி, வண்ணாத்தி ஆகிய பகுபதங்களிடையே வருகின்ற ‘த்’ என்பன இடைநிலைகளாகும். இவை உண்மையில் இடைநிலைச் சொற்கள்தாமா என்ற மயக்கம் எழுவதற்கும் வாய்ப்பு இல்லாமலில்லை. இவை தனியெழுத்தாக அமைவதும், உடம்படு மெய்போல் தோற்றமளிப்பதும் இத்தகைய மயக்கத்துக்கு ஏதுவாகின்றன. உடம்படு மெய் என்பது வேறு: இடைநில...
மேலும் படிக்கவும்

தமிழ் இலக்கணம் அறிவோம் - இயல் 02 - பகுதி 09

பதவியல்      இயல் 2   பகுதி 9 ஒன்றுடன் ஒன்று தொடர்புபட்டதாகவும் கருத்துப் புலப்படுமாறும் அமைந்திருக்கின்ற இரண்டோ அல்லது அதற்கும் மேற்பட்ட சொற்களைக் கொண்ட கூட்டே தொடர்மொழி எனப்படுகின்றது.  தொடர்மொழியானது தொகைநிலைத் தொடர், தொகாநிலைத் தொடர் என இருவகைப்படுகின்றது.  தொகைநிலைத் தொடர்: தொகைநிலைத் தொடர் என்பது உருபுகள் வெளிப்படாமல் மறைந்து நிற்கின்ற நிலையில், இரண்டு அல்லது அவற்றுக்கும் மேற்பட்ட சொற்கள் இணைந்து இலக்கணரீதியாகப் பொருள் தருவது எனலாம். தொகை என்றால் தொக்கிநிற்கிறது அல்லது மறைந்து நிற்கிறது என்று பொருள். இத்தொகைநிலைத் தொடர் வேற்றுமைத்தொகை, வினைத்தொகை, பண்புத்தொகை, உவமைத்தொகை, உம்மைத்தொகை, அன்மொழித்தொகை என அறுவகைப்படுகின்றது. 1. வேற்றுமைத்தொகை: வேற்றுமை உருபுகள் வெளிப்படையாகத் தெரியாமல் மறைந்துநின்று பொருள் தருகின்றபோது அது வேற்றுமைத்தொகை எனப்படுகிறது. வேற்றுமைகள் எட்டு என்கிறது இலக்கணம். இவற்றுள் முதல்வேற்றுமையும் எட்டாம்வேற்றுமையாகிய விளிவேற்றுமையும் உருபுகள் அற்றன. அதாவது எந்த உருபுகளையும் தம்முடன் இணைத்து மொழிநடையில் ...
மேலும் படிக்கவும்

தமிழ் இலக்கணம் அறிவோம் எழுத்தியல்- பகுதி 5

போலி எழுத்துகள். சில சமயங்களில் ஓரெழுத்தக்குப் பதிலாக வேறோர் எழுத்தைப் பயன்படுத்தும்போது அது போலி எழுத்து எனப்படுகிறது. போலிஎழுத்தும் இலக்கண வலுவுடையது என்பதால் இலக்கண நூலார் அதனை ‘வழு’ எனப் புறந்தள்ளுவதில்லை. எனினும் போலி எழுத்துகள் வலிந்து புகுத்தப்படாதிருப்பது மொழிக்கு அழகு தருமென்பதை நினைவிற் கொளல் நலம். போலி எழுத்துகள் சொல்லின் முதலில் இடம்பெறும்போது அது முதற்போலி எனவும், இடையில் இடம்பெறுகையில் இடைப்போலி எனவும், சொல்லினிறுதியில் வரும்போது கடைப்போலி எனவும் வழங்கப்படுகின்றன. 1. முதற்போலி ஓளவை          அவ்வை        ஒள அவ் போலி பௌத்தம்       பவுத்தம்        பௌ பவு போலி நண்டு              ஞண்டு           ந ஞ போலி மயல்               மையல்         ம மை போலி  மையம்           மய்யம்          மை மய் போலி ஐயர்  ...
மேலும் படிக்கவும்