வாணியே நின் திருப்பாதம் தொழுதேன். (அரங்கக் கவிதை)

வாணியே நின் திருப்பாதம் தொழுதேன்.
(அரங்கக் கவிதை)

அன்னை கலைவாணி
 அகிலாண்ட ஈஸ்வரியே
உன்னைப் பதம்பிடித்தேன்
 உய்விக்க வேண்டுமம்மா.

வெள்ளைக் கலையுடுத்தி
 வீணை இசைப்பவளே
பிள்ளை நான்தொழுதேன்
 பேறருள வேண்டுமம்மா.

வீணை தனையிசைக்கும்
 வித்தியா தத்துவமே
மோனை எதுகைக்கவி
 முன்மொழிய வேண்டுமம்மா.

உன்றன்திருப் பாதத்தில்
 உலகே சுழலுதம்மா
என்றன் வாழ்வெல்லாம்
 என்தாயே நின்சரணம்.

ஆறிவால் உயர்ந்திடவே
 அம்மா நீயருள்வாய்
நெறியாய் நடப்போரை
 நீகாக்க வேண்டுமம்மா.

புதிய கலைகள்தாயே
 பூப்பதெல்லாம் உன்னாலே
எதிலேயெவர் சிறப்புறினும்
 எல்லாமே உன்னருளே.

தாமரை மலர்கள்செய்த
 தவம்நாங்கள் செய்தோமில்லை
சாமரம் வீசும்சோலை
 தனில்இலையாய்த் தளிர்த்தோமில்லை.

இசையைச் சுமந்துவரும்
 இளங்காற்றாய் அமைந்தோமில்லை
அசைந்து வீழருவி
 அதன்நீராய்த் தவழ்ந்தோமில்லை.

உன்றன் கைவீணை
 ஒலியாக நானிருந்தால்
மன்றில்என் புகழ்சொல்ல
 மாநிலத்தில் எவர்க்கியலும்?

முன்றலில்பூத்து உன்றன்
 முகம்பார்க்கம் மல்லிகையாய்
இன்றிங்கு நானிருந்தால்
 என்பெருமை எவர்க்குண்டு?

மல்லிகைப் பூவுமல்ல
 மணம்சுமக்கும் காற்றுமல்ல
வல்லியே உனைச்சூழ்ந்த
 வனப்பான தோப்புமல்ல.

உன்னைச் சுற்றியுள்ள
 உயர்பொருள்நா னிலையெனினும்
என்னை நீசுற்றி
 இருந்துதவ வேண்டுமம்மா.


உலகாய் ஒளியாகி
 ஒளியாய்க் கலையாகி
கலையாய்க் கவினாகிக்
 காலத்தைச் சமைப்பவளே.

விழியாய் எனக்கிருப்பாய்
 வுpத்தியா கூடமிங்கு
ஓளியாய் நீயமர்ந்து
 உலகுய்ய வேயருள்வாய்.

உன்னொளி பெறாக்கல்விக்
 கூடமும் கூடமாமோ?
வெண்ணிலா இல்லாவானம்
 பௌர்ணமி எனலுந்தகுமோ?

பௌர்ணமி உண்டேல்வானம்
 பளிச்சிடும் அதுபோல்தானுன்
கருணையும் உண்டேல்கல்விக்
 கூடமும் கனன்றுஎழும்.

  அறிவொளி இங்கேதோன்றும்
     அமைதியின் வித்துமீண்டும்
  பரவிட வழிகள்தோன்றும்
    பலப்பல நன்மைதோன்றும்.

மானுடம் சிறந்துஓங்கும்
 மனங்களில் மகிழ்ச்சிபொங்கும்
வீணர்கள் வாதம்தூங்கும்
 விடிவுற வழிகள்துலங்கும்.


வள்ளுவன் குறளில்தந்த
 வாழ்க்கையும் இங்கேதோன்றும்
தௌ;ளு தமிழின்பெருமை
 தெருவெலாம் ஒலிக்கும்சிறக்கும்.

இங்குளோர் துயரம்விலக
 எங்களின் அறிவுஉதவும்
மங்கலம் மலியும்நாட்டில்
 மனிதர்கள் உளமுந்தெளியும்.

அவளருள் இருந்தால்நாட்டில்
 அனைத்துமே நன்றாய்நடக்கும்
அவளொளி வீசில்உலகில்
 அமைதியே அரசாய்அமரும்.

அன்னையே பணிந்தோம்தாயே
 அனைத்துயிர் வாழ்வுசிறக்க
நின்திருப் பாதம்தொழுதேன்
 வாணியே சரணம்தாயே.

கந்தவனம் கோணேஸ்வரன்.

(1994இல் நவராத்திரிக் கவியரங்கில் பாடிய கவிதை.)














கருத்துகள்

கருத்துரையிடுக

இந்த வலைப்பதிவில் உள்ள பிரபலமான இடுகைகள்

தமிழ் இலக்கணம் அறிவோம் - இயல் 02 - பகுதி 4

பதவியல் 4 இடைச் சொற்கள்.  இடைநிலை. ஒரு பகுபதத்தில் பகுதி, விகுதி என்பவற்றுக்கு அடுத்தபடியாக முக்கிய இடம் வகிப்பவை இடைநிலைகளாகும். விகுதியானது திணை, பால் எண், இடம் என்பவற்றைக் காட்டுவதுபோல் வினைச் சொற்களுடன் இணைந்துவருகின்ற இடைநிலைகள் காலத்தைக் காட்டுகின்றன. பெயர்ச்சொற்களிடையே வருகின்ற இடைநிலைகள் காலங்காட்டுவதில்லை. இவற்றின் தன்மையைக் கொண்டு அறிஞர்கள் மூவகைப் படுத்தியுள்ளனர். அவை பெயர் இடைநிலை, வினை இடைநிலை, எதிர்மறை இடைநிலை என்பவையாம்.  பெயர் இடைநிலை: இவை பெயர்ச்சொற்களின் பகுதி, விகுதிகளுக்கு இடையே வருகின்றதெனினும் காலங்காட்டுவதில்லை. உதாரணமாக, அறிஞன், வலைஞன், சுவைஞன் என்பவற்றில் வருகின்ற ‘ஞ’கர மெய் இடைநிலை எனப்படுகிறது. அதேபோல் வலைச்சி என்ற பகுபதத்தில் வருகின்ற ‘ச்’, குறத்தி, வண்ணாத்தி ஆகிய பகுபதங்களிடையே வருகின்ற ‘த்’ என்பன இடைநிலைகளாகும். இவை உண்மையில் இடைநிலைச் சொற்கள்தாமா என்ற மயக்கம் எழுவதற்கும் வாய்ப்பு இல்லாமலில்லை. இவை தனியெழுத்தாக அமைவதும், உடம்படு மெய்போல் தோற்றமளிப்பதும் இத்தகைய மயக்கத்துக்கு ஏதுவாகின்றன. உடம்படு மெய் என்பது வேறு: இடைநில...
மேலும் படிக்கவும்

தமிழ் இலக்கணம் அறிவோம் - இயல் 02 - பகுதி 09

பதவியல்      இயல் 2   பகுதி 9 ஒன்றுடன் ஒன்று தொடர்புபட்டதாகவும் கருத்துப் புலப்படுமாறும் அமைந்திருக்கின்ற இரண்டோ அல்லது அதற்கும் மேற்பட்ட சொற்களைக் கொண்ட கூட்டே தொடர்மொழி எனப்படுகின்றது.  தொடர்மொழியானது தொகைநிலைத் தொடர், தொகாநிலைத் தொடர் என இருவகைப்படுகின்றது.  தொகைநிலைத் தொடர்: தொகைநிலைத் தொடர் என்பது உருபுகள் வெளிப்படாமல் மறைந்து நிற்கின்ற நிலையில், இரண்டு அல்லது அவற்றுக்கும் மேற்பட்ட சொற்கள் இணைந்து இலக்கணரீதியாகப் பொருள் தருவது எனலாம். தொகை என்றால் தொக்கிநிற்கிறது அல்லது மறைந்து நிற்கிறது என்று பொருள். இத்தொகைநிலைத் தொடர் வேற்றுமைத்தொகை, வினைத்தொகை, பண்புத்தொகை, உவமைத்தொகை, உம்மைத்தொகை, அன்மொழித்தொகை என அறுவகைப்படுகின்றது. 1. வேற்றுமைத்தொகை: வேற்றுமை உருபுகள் வெளிப்படையாகத் தெரியாமல் மறைந்துநின்று பொருள் தருகின்றபோது அது வேற்றுமைத்தொகை எனப்படுகிறது. வேற்றுமைகள் எட்டு என்கிறது இலக்கணம். இவற்றுள் முதல்வேற்றுமையும் எட்டாம்வேற்றுமையாகிய விளிவேற்றுமையும் உருபுகள் அற்றன. அதாவது எந்த உருபுகளையும் தம்முடன் இணைத்து மொழிநடையில் ...
மேலும் படிக்கவும்

தமிழ் இலக்கணம் அறிவோம் எழுத்தியல்- பகுதி 5

போலி எழுத்துகள். சில சமயங்களில் ஓரெழுத்தக்குப் பதிலாக வேறோர் எழுத்தைப் பயன்படுத்தும்போது அது போலி எழுத்து எனப்படுகிறது. போலிஎழுத்தும் இலக்கண வலுவுடையது என்பதால் இலக்கண நூலார் அதனை ‘வழு’ எனப் புறந்தள்ளுவதில்லை. எனினும் போலி எழுத்துகள் வலிந்து புகுத்தப்படாதிருப்பது மொழிக்கு அழகு தருமென்பதை நினைவிற் கொளல் நலம். போலி எழுத்துகள் சொல்லின் முதலில் இடம்பெறும்போது அது முதற்போலி எனவும், இடையில் இடம்பெறுகையில் இடைப்போலி எனவும், சொல்லினிறுதியில் வரும்போது கடைப்போலி எனவும் வழங்கப்படுகின்றன. 1. முதற்போலி ஓளவை          அவ்வை        ஒள அவ் போலி பௌத்தம்       பவுத்தம்        பௌ பவு போலி நண்டு              ஞண்டு           ந ஞ போலி மயல்               மையல்         ம மை போலி  மையம்           மய்யம்          மை மய் போலி ஐயர்  ...
மேலும் படிக்கவும்